badan par zaKHm the aur ustuKHwan mein din nahin tha

badan par zaḳhm the aur ustuḳhvāñ meñ din nahīñ thā

bahut taare the apne āsmāñ meñ din nahīñ thā

mirī ḳhvāhish ke jitnā kab huā mujh meñ sarābāñ

ki bahr-e-dasht ke kaun-o-makāñ meñ din nahīñ thā

añdhere meñ the apne qahqahe bhī siskiyāñ bhī

hamāre vasl ke sūd-o-ziyāñ meñ din nahīñ thā

basantī dhuup thī darkār hariyālī kī ḳhātir

ḳhizāni-rut thī hisse gulsitāñ meñ din nahīñ thā

haqīqat ḳhvāb meñ Dhalne ko thī maujūdgāñ meñ

samay kī aañkh ke ā.indagāñ meñ din nahīñ thā

hamāre grahan ko sūraj lagānā kab thā mumkin

bahut DhūñDā magar asr-e-ravāñ meñ din nahīñ thā

nikalnā thā gharoñ se raat meñ tohmat barābar

aur 'asvad' is havas-parvar jahāñ meñ din nahīñ thā

badan par zaKHm the aur ustuKHwan mein din nahin tha

bahut tare the apne aasman mein din nahin tha

meri KHwahish ke jitna kab hua mujh mein saraban

ki bahr-e-dasht ke kaun-o-makan mein din nahin tha

andhere mein the apne qahqahe bhi siskiyan bhi

hamare wasl ke sud-o-ziyan mein din nahin tha

basanti dhup thi darkar hariyali ki KHatir

KHizani-rut thi hisse gulsitan mein din nahin tha

haqiqat KHwab mein Dhalne ko thi maujudgan mein

samay ki aankh ke aaindagan mein din nahin tha

hamare grahan ko suraj lagana kab tha mumkin

bahut DhunDa magar asr-e-rawan mein din nahin tha

nikalna tha gharon se raat mein tohmat barabar

aur 'aswad' is hawas-parwar jahan mein din nahin tha