بدن پہ خاک وہ اپنی لگا کے لیٹا ہے

بدن پہ خاک وہ اپنی لگا کے لیٹا ہے

فلک کو پاؤں کے نیچے دبا کے لیٹا ہے

افیم اپنے غموں کی وہ کھا کے لیٹا ہے

غرور عشق کو تکیہ بنا کے لیٹا ہے

جھلس رہا ہے ستاروں کا جسم گرمی سے

جنوں کی آگ سے وہ دل جلا کے لیٹا ہے

اب اس کے ظرف پہ کیوں ہو نہ دو جہاں قربان

جو کہکشاں کو بھی گھر میں سجا کے لیٹا ہے

اب اس کی لاج بھی اللہ رکھنے والا ہے

جو اس کی شان میں دنیا لٹا کے لیٹا ہے

کسی کے رحم و کرم سے نہیں بلندی ہے

وہ کہسار پہ اپنی انا کے لیٹا ہے

ہے اس کے پاؤں کی مٹی میں ایک گنجینہ

وہ اپنا درد اسی میں چھپا کے لیٹا ہے

ہوا کے پاؤں سے باندھی ہے موت کی آہٹ

وفا کے دشت میں دھونی رما کے لیٹا ہے

وہ بوریا جسے تبریز اوڑھا کرتا تھا

اسے ندیمؔ زمیں پر بچھا کے لیٹا ہے