badan pe KHak wo apni laga ke leTa hai

badan pe ḳhaak vo apnī lagā ke leTā hai

falak ko paañv ke nīche dabā ke leTā hai

afiim apne ġhamoñ kī vo khā ke leTā hai

ġhurūr-e-ishq ko takiya banā ke leTā hai

jhulas rahā hai sitāroñ kā jism garmī se

junūñ kī aag se vo dil jalā ke leTā hai

ab us ke zarf pe kyoñ ho na do-jahāñ qurbān

jo kahkashāñ ko bhī ghar meñ sajā ke leTā hai

ab us kī laaj bhī allāh rakhne vaalā hai

jo us kī shaan meñ duniyā luTā ke leTā hai

kisī ke rahm-o-karam se nahīñ bulandī hai

vo kohsār pe apnī anā ke leTā hai

hai us ke paañv kī miTTī meñ ek ganjīna

vo apnā dard isī meñ chhupā ke leTā hai

havā ke paañv se bāñdhī hai maut kī aahaT

vafā ke dasht meñ dhūnī ramā ke leTā hai

vo boriyā jise tabrez oḌhā kartā thā

use 'nadīm' zamīñ par bichhā ke leTā hai

badan pe KHak wo apni laga ke leTa hai

falak ko panw ke niche daba ke leTa hai

afim apne ghamon ki wo kha ke leTa hai

ghurur-e-ishq ko takiya bana ke leTa hai

jhulas raha hai sitaron ka jism garmi se

junun ki aag se wo dil jala ke leTa hai

ab us ke zarf pe kyon ho na do-jahan qurban

jo kahkashan ko bhi ghar mein saja ke leTa hai

ab us ki laj bhi allah rakhne wala hai

jo us ki shan mein duniya luTa ke leTa hai

kisi ke rahm-o-karam se nahin bulandi hai

wo kohsar pe apni ana ke leTa hai

hai us ke panw ki miTTi mein ek ganjina

wo apna dard isi mein chhupa ke leTa hai

hawa ke panw se bandhi hai maut ki aahaT

wafa ke dasht mein dhuni rama ke leTa hai

wo boriya jise tabrez oDha karta tha

use 'nadim' zamin par bichha ke leTa hai