badan pe zaKHm sajae lahu labaada kiya

badan pe zaḳhm sajā.e lahū labāda kiyā

har ek sañg se yuuñ ham ne istifāda kiyā

hai yuuñ ki kuchh to baġhāvat-sirisht ham bhī haiñ

sitam bhī us ne zarūrat se kuchh ziyāda kiyā

hameñ to maut bhī de koī kab gavārā thā

ye apnā qatl to bil-qasd bil-irāda kiyā

bas ek jaan bachī thī chhiḌak dī rāhoñ par

dil-e-ġharīb ne ik ehtimām saada kiyā

jo jis jagah ke thā qābil use vahīñ rakkhā

na ziyāda kam kiyā ham ne na kam ziyāda kiyā

bachā liyā hai jo sar apnā saḳht nādim haiñ

magar ye apnā tahaffuz to be-irāda kiyā

na lauTne kā hai rasta na Thaharne kī hai jā

kidhar kā aaj junūñ ne mire irāda kiyā

badan pe zaKHm sajae lahu labaada kiya

har ek sang se yun hum ne istifada kiya

hai yun ki kuchh to baghawat-sirisht hum bhi hain

sitam bhi us ne zarurat se kuchh ziyaada kiya

hamein to maut bhi de koi kab gawara tha

ye apna qatl to bil-qasd bil-irada kiya

bas ek jaan bachi thi chhiDak di rahon par

dil-e-gharib ne ek ehtimam sada kiya

jo jis jagah ke tha qabil use wahin rakkha

na ziyaada kam kiya hum ne na kam ziyaada kiya

bacha liya hai jo sar apna saKHt nadim hain

magar ye apna tahaffuz to be-irada kiya

na lauTne ka hai rasta na Thaharne ki hai ja

kidhar ka aaj junun ne mere irada kiya