badan qubul hai uryaniyat ka mara hua

badan qubūl hai uryāniyat kā maarā huā

magar libās na pahneñge ham utārā huā

vo jis ke surḳh ujāle meñ ham munavvar the

vo din bhī shab ke ta.āqub meñ thā guzārā huā

panāh-e-gāh-e-shajar fat.h kar ke soyā hai

masāfatoñ kī thakan se ye jism haarā huā

mujhe zamīn kī partoñ meñ rakh diyā kis ne

maiñ ek naqsh thā aflāk pe ubhārā huā

ḳharīdne ke liye us ko bik gayā ḳhud hī

maiñ vo huuñ jis ko munāfe meñ bhī ḳhasārā huā

samā gayā mire pairoñ ke ābloñ meñ 'salīm'

chalo ki aaj se ye ḳhaar bhī hamārā huā

badan qubul hai uryaniyat ka mara hua

magar libas na pahnenge hum utara hua

wo jis ke surKH ujale mein hum munawwar the

wo din bhi shab ke taaqub mein tha guzara hua

panah-e-gah-e-shajar fath kar ke soya hai

masafaton ki thakan se ye jism haara hua

mujhe zamin ki parton mein rakh diya kis ne

main ek naqsh tha aflak pe ubhaara hua

KHaridne ke liye us ko bik gaya KHud hi

main wo hun jis ko munafe mein bhi KHasara hua

sama gaya mere pairon ke aablon mein 'salim'

chalo ki aaj se ye KHar bhi hamara hua