بڑے ادب بڑی حکمت کے ساتھ ہو رہا ہے

بڑے ادب بڑی حکمت کے ساتھ ہو رہا ہے

یہاں گناہ بھی عزت کے ساتھ ہو رہا ہے

یقین کیجیے نفرت ہی ہوگا رد عمل

سلوک اب جو محبت کے ساتھ ہو رہا ہے

میں ان کے حسن تصور کا لطف لے رہا ہوں

غزل کا شعر عبادت کے ساتھ ہو رہا ہے

مکین خلد ہی دوزخ بنا رہے ہیں اسے

عجیب سانحہ جنت کے ساتھ ہو رہا ہے

بہت دنوں سے ان اچھے دنوں کی حسرت میں

گزارا صبر و قناعت کے ساتھ ہو رہا ہے

جنون پہنچا ہے اب کس مقام پہ دلبرؔ

خرد کا کام بھی وحشت کے ساتھ ہو رہا ہے