baDe KHatre mein hai husn-e-gulistan hum na kahte the

baḌe ḳhatre meñ hai husn-e-gulistāñ ham na kahte the

chaman tak aa ga.ī dīvār-e-zindāñ ham na kahte the

bhare bāzār meñ jins-e-vafā be-ābrū hogī

uThegā e'tibār-e-kū-e-jānāñ ham na kahte the

usī mahfil usī bazm-e-vafā ke goshe goshe meñ

luTegī masti-e-chashm-e-ġhazālāñ, ham na kahte the

isī raste meñ āḳhir vo kaḌī manzil bhī aa.egī

jahāñ dam toḌ degī yād-e-yārāñ ham na kahte the

ḳhizāñ kī āhaToñ par kāñptī haiñ pattiyāñ gul kī

bikharne ko hai ab zulf-e-bahārāñ ham na kahte the

dil-e-fitrat-shanās āḳhir kahīñ yūñhī dhaḌaktā hai

fareb-e-husn hai jashn-e-charāġhāñ ham na kahte the

baDe KHatre mein hai husn-e-gulistan hum na kahte the

chaman tak aa gai diwar-e-zindan hum na kahte the

bhare bazar mein jins-e-wafa be-abru hogi

uThega e'tibar-e-ku-e-jaanan hum na kahte the

usi mahfil usi bazm-e-wafa ke goshe goshe mein

luTegi masti-e-chashm-e-ghazalan, hum na kahte the

isi raste mein aaKHir wo kaDi manzil bhi aaegi

jahan dam toD degi yaad-e-yaran hum na kahte the

KHizan ki aahaTon par kanpti hain pattiyan gul ki

bikharne ko hai ab zulf-e-bahaaran hum na kahte the

dil-e-fitrat-shanas aaKHir kahin yunhi dhaDakta hai

fareb-e-husn hai jashn-e-charaghan hum na kahte the