baDe saliqe se milte hain etibar ke dukh

baḌe salīqe se milte haiñ e'tibār ke dukh

mire nasīb meñ likkhe ga.e haiñ yaar ke dukh

tumheñ ghaḌī kī zarūrat nahīñ paḌī ab tak

to kaise jaan sakoge tum intizār ke dukh

vo shaḳhs jis ko mayassar nahīñ hai dūsrā shaḳhs

usī ko sab se ziyāda hai ġham-gusār ke dukh

mujhe kisī se gila hai na koī ranjish hai

magar vo log jo rakhte haiñ iḳhtiyār ke dukh

jo log raat ko so jaate haiñ sukūn ke saath

vo log kyā hī samajhte haiñ be-qarār ke dukh

bas ek baar uThā le koī qadam 'shāfī'

phir is ke baa'd nahīñ hoñge baar baar ke dukh

baDe saliqe se milte hain e'tibar ke dukh

mere nasib mein likkhe gae hain yar ke dukh

tumhein ghaDi ki zarurat nahin paDi ab tak

to kaise jaan sakoge tum intizar ke dukh

wo shaKHs jis ko mayassar nahin hai dusra shaKHs

usi ko sab se ziyaada hai gham-gusar ke dukh

mujhe kisi se gila hai na koi ranjish hai

magar wo log jo rakhte hain iKHtiyar ke dukh

jo log raat ko so jate hain sukun ke sath

wo log kya hi samajhte hain be-qarar ke dukh

bas ek bar uTha le koi qadam 'shafi'

phir is ke ba'd nahin honge bar bar ke dukh