baDe sukun se KHud apne ham-saron mein rahe

baḌe sukūn se ḳhud apne ham-saroñ meñ rahe

jab ā.ina-sifat insān pattharoñ meñ rahe

bhalā vo kaise jarā.em ke haath kāTeñge

jo sahme simTe se ḳhud apne bistaraoñ meñ rahe

nafas nafas thā bikharne kā silsila jaarī

barā.e naam hī mahfūz ham gharoñ meñ rahe

hamārī nukta-rasī is qadar girāñ guzrī

ki ban ke ḳhaar hamesha nazar-varoñ meñ rahe

sahīfe fikr-o-nazar ke jo de ga.e tartīb

vahī to sher-o-suḳhan ke payambaroñ meñ rahe

uThā.e dosh pe maslūb hasratoñ kī laash

ham apne shahr ke ḳhūñ-bār manzaroñ meñ rahe

tarāsh kar na.ī tahzīb ke sanam ham log

''ba-sad vaqār zamāne ke āzaroñ meñ rahe

baDe sukun se KHud apne ham-saron mein rahe

jab aaina-sifat insan pattharon mein rahe

bhala wo kaise jaraem ke hath kaTenge

jo sahme simTe se KHud apne bistaraon mein rahe

nafas nafas tha bikharne ka silsila jari

barae nam hi mahfuz hum gharon mein rahe

hamari nukta-rasi is qadar giran guzri

ki ban ke KHar hamesha nazar-waron mein rahe

sahife fikr-o-nazar ke jo de gae tartib

wahi to sher-o-suKHan ke payambaron mein rahe

uThae dosh pe maslub hasraton ki lash

hum apne shahr ke KHun-bar manzaron mein rahe

tarash kar nai tahzib ke sanam hum log

ba-sad waqar zamane ke aazaron mein rahe