baDh gaya dard dawaon ka asar hone tak

baḌh gayā dard davāoñ kā asar hone tak

chhoḌ kar chal diyā bīmār ḳhabar hone tak

jab se bīmār kī ruḳhsat kā yaqīñ aane lagā

aañkh lagtī hī nahīñ ab to sahar hone tak

aable phuuT ke rote rahe raftār ke saath

phuul khulte rahe anjām-e-safar hone tak

ik riyāzat hai ibādat hai ye taḳhlīq kā fan

vaqt darkār hai paude ko shajar hone tak

chīḳh kar ro diyā bādal ki havāoñ kā ġhurūr

kis tarah TuuT gayā ma.arka sar hone tak

ye duā hai ki har āñgan kā shajar phūle phale

phuul khulte raheñ shāḳhoñ pe samar hone tak

un ko mālūm jo hotā to karam kar dete

ham yahāñ miT bhī ga.e un ko ḳhabar hone tak

chaḌhte sūraj kī parastār banī thī duniyā

ham bhī dekhā kiye aiboñ ko hunar hone tak

sher-goī koī āsān nahīñ hai 'nik.hat'

baal pak jaate haiñ lafzoñ meñ asar hone tak

baDh gaya dard dawaon ka asar hone tak

chhoD kar chal diya bimar KHabar hone tak

jab se bimar ki ruKHsat ka yaqin aane laga

aankh lagti hi nahin ab to sahar hone tak

aable phuT ke rote rahe raftar ke sath

phul khulte rahe anjam-e-safar hone tak

ek riyazat hai ibaadat hai ye taKHliq ka fan

waqt darkar hai paude ko shajar hone tak

chiKH kar ro diya baadal ki hawaon ka ghurur

kis tarah TuT gaya marka sar hone tak

ye dua hai ki har aangan ka shajar phule phale

phul khulte rahen shaKHon pe samar hone tak

un ko malum jo hota to karam kar dete

hum yahan miT bhi gae un ko KHabar hone tak

chaDhte suraj ki parastar bani thi duniya

hum bhi dekha kiye aibon ko hunar hone tak

sher-goi koi aasan nahin hai 'nikhat'

baal pak jate hain lafzon mein asar hone tak