baDha di ek nazar mein tu ne kya tauqir patthar ki

baḌhā dī ik nazar meñ tū ne kyā tauqīr patthar kī

banā kohl-ul-basar allāh re taqdīr patthar kī

asīr-e-zulf kyūñkar chhuT sakeñge qaid-e-vahshat se

ki hai har jāda-e-dasht-e-junūñ zanjīr patthar kī

ye jalva hai kunisht-o-dair meñ saan.e kī qudrat kā

ki dāva-e-ḳhudā.ī kartī hai tasvīr patthar kī

talāsh-e-rizq meñ ho āsiyā kī tarah sargardāñ

agar daanā hai tū bhī siikh le tadbīr patthar kī

batā sañg-e-jarāhat aa ke zaḳhm-e-teġh-e-abrū par

huā achchhā tire āshiq ko dī ta.azīr patthar kī

fusūn-e-chashm-e-qātil se banā huuñ sehr kā putlā

jo chhū le merī gardan ko to ho shamshīr patthar kī

shab-e-furqat meñ jo soche the karte vo shikāyat kyā

nazar karte hī un par ban ga.e tasvīr patthar kī

na niklī hai na niklegī jamī hai dil meñ jo un ke

miTāne se bhī miTtī hai kahīñ tahrīr patthar kī

sazā-e-ishq-e-mizhgān-e-butān-e-sañg-dil paa.ī

huī bārish har ik jānib se ham par tiir patthar kī

na farq aayā 'habīb'-e-sābir-o-shākir kī rāhat meñ

banā duniyā meñ qismat kā likhā tahrīr patthar kī

baDha di ek nazar mein tu ne kya tauqir patthar ki

bana kohl-ul-basar allah re taqdir patthar ki

asir-e-zulf kyunkar chhuT sakenge qaid-e-wahshat se

ki hai har jada-e-dasht-e-junun zanjir patthar ki

ye jalwa hai kunisht-o-dair mein sane ki qudrat ka

ki dawa-e-KHudai karti hai taswir patthar ki

talash-e-rizq mein ho aasiya ki tarah sargardan

agar dana hai tu bhi sikh le tadbir patthar ki

bata sang-e-jarahat aa ke zaKHm-e-tegh-e-abru par

hua achchha tere aashiq ko di tazir patthar ki

fusun-e-chashm-e-qatil se bana hun sehr ka putla

jo chhu le meri gardan ko to ho shamshir patthar ki

shab-e-furqat mein jo soche the karte wo shikayat kya

nazar karte hi un par ban gae taswir patthar ki

na nikli hai na niklegi jami hai dil mein jo un ke

miTane se bhi miTti hai kahin tahrir patthar ki

saza-e-ishq-e-mizhgan-e-butan-e-sang-dil pai

hui barish har ek jaanib se hum par tir patthar ki

na farq aaya 'habib'-e-sabir-o-shakir ki rahat mein

bana duniya mein qismat ka likha tahrir patthar ki