baDha tanhai mein ehsas-e-gham aahista aahista

baḌhā tanhā.ī meñ ehsās-e-ġham āhista āhista

hameñ yaad aa.e sab ahl-e-karam āhista āhista

dil-e-muztar kī betābī kā aalam kaisā aalam hai

khiñchā jaatā hai dil sū-e-sanam āhista āhista

chalā huuñ manzil-e-jānāñ maiñ kuchh aise ta.assur se

nazar sharminda sharminda qadam āhista āhista

nigāh-e-lutf kis kī ho ga.ī mere muqaddar par

ye kis kā ho gayā husn-e-karam āhista āhista

mohabbat karne kā ham ko sila achchhā milā ai dil

simaT aa.e mire dāman meñ ġham āhista āhista

haqīqat meñ agar pūchho bahārān-e-gulistāñ kā

chaman vāloñ ne toḌā hai bharam āhista āhista

kahāñ tak zabt karte bazm kī kotāh-bīnī ko

'mubīn' uThnā paḌā bā-chashm-e-nam āhista āhista

baDha tanhai mein ehsas-e-gham aahista aahista

hamein yaad aae sab ahl-e-karam aahista aahista

dil-e-muztar ki betabi ka aalam kaisa aalam hai

khincha jata hai dil su-e-sanam aahista aahista

chala hun manzil-e-jaanan main kuchh aise tassur se

nazar sharminda sharminda qadam aahista aahista

nigah-e-lutf kis ki ho gai mere muqaddar par

ye kis ka ho gaya husn-e-karam aahista aahista

mohabbat karne ka hum ko sila achchha mila ai dil

simaT aae mere daman mein gham aahista aahista

haqiqat mein agar puchho bahaaran-e-gulistan ka

chaman walon ne toDa hai bharam aahista aahista

kahan tak zabt karte bazm ki kotah-bini ko

'mubin' uThna paDa ba-chashm-e-nam aahista aahista