baDhega din na chalegi hawa hamare baad

baḌhegā din na chalegī havā hamāre ba.ad

sameT legā ye duniyā ḳhudā hamāre ba.ad

hamārā sadqa utāro ai barchhiyo bhālo

ki kaun rakkhegā zauq-e-qazā hamāre baad

hamīñ haiñ sang-e-hifāzat baqā-e-shīsha-garī

ki Tuut jā.egā har aa.ina hamāre baad

ham aise jā.eñge le kar balā.eñ duniyā kī

kahīñ na hogā koī hādisa hamāre baad

diyoñ ko jaao ḳhabar-dār kar ke aa jaao

ki sarkashī pe tulegī havā hamāre baad

musāfirān-e-musībat ye kahte jaate haiñ

luTe na aise koī qāfila hamāre baad

jahāñ pe bichhḌe the ham tum vo ho gayā daldal

ki itnā royā vo ik rāsta hamāre baad

hameñ bhī koī ḳhamoshī nahīñ pukāregī

tumheñ bhī koī na degā sadā hamāre baa'd

maqām-e-pahlū tirā masnadoñ se a.alā hai

kisī ko denā na ye martaba hamāre baad

ki jaate jaate hameñ itnā to batā jaao

ki aglī kyā hai tumhārī duā hamāre baad

baDhega din na chalegi hawa hamare baad

sameT lega ye duniya KHuda hamare baad

hamara sadqa utaro ai barchhiyo bhaalo

ki kaun rakkhega zauq-e-qaza hamare baad

hamin hain sang-e-hifazat baqa-e-shisha-gari

ki Tut jaega har aaina hamare baad

hum aise jaenge le kar balaen duniya ki

kahin na hoga koi hadisa hamare baad

diyon ko jao KHabar-dar kar ke aa jao

ki sarkashi pe tulegi hawa hamare baad

musafiran-e-musibat ye kahte jate hain

luTe na aise koi qafila hamare baad

jahan pe bichhDe the hum tum wo ho gaya daldal

ki itna roya wo ek rasta hamare baad

hamein bhi koi KHamoshi nahin pukaregi

tumhein bhi koi na dega sada hamare ba'd

maqam-e-pahlu tera masnadon se aala hai

kisi ko dena na ye martaba hamare baad

ki jate jate hamein itna to bata jao

ki agli kya hai tumhaari dua hamare baad