baDhin idhar jo wo nazren to phir raha na gaya

baḌhīñ idhar jo vo nazreñ to phir rahā na gayā

gunāhgār bane pārsā banā na gayā

bahār ban ke phire vo chaman chaman bhī to kyā

hamāre dil kī kalī to koī khilā na gayā

isī kā naam hai vā'da to sau salām mirā

ki aaj tak koī vā'da vafā kiyā na gayā

ye aur baat ki ham kuchh bhī yaad rakh na sake

zamāna kab hameñ apnā sabaq paḌhā na gayā

ab aur is se sivā inqalāb kyā hotā

vo dekhā āñkhoñ ne kānoñ se jo sunā na gayā

chaman chaman na huā aur kalī kalī na huī

vo aa ke baaġh meñ jab tak ki muskurā na gayā

ba-nām-e-tauba diye toḌ kitne ḳhālī jaam

magar bharā huā sāġhar paTak diyā na gayā

ḳhabar sunī hai ki rindoñ se bhar ga.ī jannat

janāb-e-shaiḳh ke baare meñ kuchh sunā na gayā

kise ḳhabar thī ki iz.hār-e-'ishq bhī hai gunāh

ḳhudā kā shukr ki 'bismil' se kuchh kahā na gayā

baDhin idhar jo wo nazren to phir raha na gaya

gunahgar bane parsa bana na gaya

bahaar ban ke phire wo chaman chaman bhi to kya

hamare dil ki kali to koi khila na gaya

isi ka nam hai wa'da to sau salam mera

ki aaj tak koi wa'da wafa kiya na gaya

ye aur baat ki hum kuchh bhi yaad rakh na sake

zamana kab hamein apna sabaq paDha na gaya

ab aur is se siwa inqalab kya hota

wo dekha aankhon ne kanon se jo suna na gaya

chaman chaman na hua aur kali kali na hui

wo aa ke bagh mein jab tak ki muskura na gaya

ba-nam-e-tauba diye toD kitne KHali jam

magar bhara hua saghar paTak diya na gaya

KHabar suni hai ki rindon se bhar gai jannat

janab-e-shaiKH ke bare mein kuchh suna na gaya

kise KHabar thi ki izhaar-e-'ishq bhi hai gunah

KHuda ka shukr ki 'bismil' se kuchh kaha na gaya