baDhne de abhi kashmakash-e-tar-e-nafas aur

baḌhne de abhī kashmakash-e-tār-e-nafas aur

ai gosh-bar-āvāz zarā der taras aur

ham mā.il-e-parvāz rahe jitnī lagan se

uThtī hī ga.ī utnī hī dīvār-e-qafas aur

ye ātish-e-shauq aur ye do-chār phuvāreñ

ai abr-e-siyah-mast zarā khul ke baras aur

ik qāfila-e-zīst bichhaḌ jaa.e to kyā ġham

aatī hai bahut duur se āvāz-e-jaras aur

fardā meñ bahāroñ ke nishāñ DhūñDne vaalo

kyā hogā zamāne kā chalan ab ke baras aur

ham ne jo 'tamannā.ī' bayābān-e-talab meñ

ik umr guzārī hai to do-chār baras aur

baDhne de abhi kashmakash-e-tar-e-nafas aur

ai gosh-bar-awaz zara der taras aur

hum mail-e-parwaz rahe jitni lagan se

uThti hi gai utni hi diwar-e-qafas aur

ye aatish-e-shauq aur ye do-chaar phuwaren

ai abr-e-siyah-mast zara khul ke baras aur

ek qafila-e-zist bichhaD jae to kya gham

aati hai bahut dur se aawaz-e-jaras aur

farda mein bahaaron ke nishan DhunDne walo

kya hoga zamane ka chalan ab ke baras aur

hum ne jo 'tamannai' bayaban-e-talab mein

ek umr guzari hai to do-chaar baras aur