بڑھتے بڑھتے یہ اندھیرے روشنی تک آ گئے

بڑھتے بڑھتے یہ اندھیرے روشنی تک آ گئے

یاس کے لمحے ہماری زندگی تک آ گئے

کل نہ جانے کیا مذاق منزل مقصود ہو

آج کے رہبر فروغ گمرہی تک آ گئے

کس کو کیا حاصل ہوا ہے اس جہان شوق میں

ہوش والے بے سبب دیوانگی تک آ گئے

آج تک سلجھے ہوئے تھے جو ہمارے سامنے

مسئلے ایسے بھی کچھ پیچیدگی تک آ گئے

جو یہ کہتے تھے بجائے خود نشہ ہے زندگی

ایسے کچھ انسان بھی تو مے کشی تک آ گئے

اس زمانے نے دئے کچھ دوست ایسے بھی ہمیں

دوستی کی راہ سے جو دشمنی تک آ گئے

اب زمانے کی زباں کو کون روکے گا حضور

آپ نے یہ کیا کیا اک اجنبی تک آ گئے

اب کہاں روکے سے شاہدؔ رک سکیں گے انقلاب

جن کو آنا تھا وہ حد برہمی تک آ گئے