baDhte baDhte ye andhere raushni tak aa gae

baḌhte baḌhte ye añdhere raushnī tak aa ga.e

yaas ke lamhe hamārī zindagī tak aa ga.e

kal na-jāne kyā mazāq-e-manzil-e-maqsūd ho

aaj ke rahbar faroġh-e-gumrahī tak aa ga.e

kis ko kyā hāsil huā hai is jahān-e-shauq meñ

hosh vaale be-sabab dīvāngī tak aa ga.e

aaj tak suljhe hue the jo hamāre sāmne

mas.ale aise bhī kuchh pechīdgī tak aa ga.e

jo ye kahte the bajā-e-ḳhud nasha hai zindagī

aise kuchh insān bhī to mai-kashī tak aa ga.e

is zamāne ne diye kuchh dost aise bhī hameñ

dostī kī raah se jo dushmanī tak aa ga.e

ab zamāne kī zabāñ ko kaun rokegā huzūr

aap ne ye kyā kiyā ik ajnabī tak aa ga.e

ab kahāñ roke se 'shāhid' ruk sakeñge inqilāb

jin ko aanā thā vo hadd-e-barhamī tak aa ga.e

baDhte baDhte ye andhere raushni tak aa gae

yas ke lamhe hamari zindagi tak aa gae

kal na-jaane kya mazaq-e-manzil-e-maqsud ho

aaj ke rahbar farogh-e-gumrahi tak aa gae

kis ko kya hasil hua hai is jahan-e-shauq mein

hosh wale be-sabab diwangi tak aa gae

aaj tak suljhe hue the jo hamare samne

masale aise bhi kuchh pechidgi tak aa gae

jo ye kahte the baja-e-KHud nasha hai zindagi

aise kuchh insan bhi to mai-kashi tak aa gae

is zamane ne diye kuchh dost aise bhi hamein

dosti ki rah se jo dushmani tak aa gae

ab zamane ki zaban ko kaun rokega huzur

aap ne ye kya kiya ek ajnabi tak aa gae

ab kahan roke se 'shahid' ruk sakenge inqilab

jin ko aana tha wo hadd-e-barhami tak aa gae