baDi baDi imaraton ko hairaton se dekhna

baḌī baḌī 'imāratoñ ko hairatoñ se dekhnā

phir us ke baa'd apne ghar ko āñsuoñ se dekhnā

ḳharīd lā.ūñ sab se mahñgī chūḌiyāñ jahān kī

phir ek ḳhvāb rañg-birangī chūḌiyoñ se dekhnā

kisī kī aartī suhāg ke liye utārnā

phir apnī hī chitā ko surma.ī dhuāñ se dekhnā

baḌā ajab gunāh hai baḌī ajiib baat hai

ye ek dūsre ko bhīgī chāhatoñ se dekhnā

ham ek puurī dāstāñ haiñ yaad kar ke dekhiye

kabhī hameñ vafā ke TuuTe silsiloñ se dekhnā

kahāñ-kahāñ jale charāġh le ke ham khaḌe rahe

hamārī zinda dāstāñ ko khanDaroñ se dekhnā

bahut qarīb ham ko apnī āhaToñ se pāoge

nazar se duur jā ke ham ko rāstoñ se dekhnā

zamīñ se āsmāñ talak na koī baat pāoge

kabhī kabhī ġhazal ko us ke qāfiyoñ se dekhnā

baDi baDi 'imaraton ko hairaton se dekhna

phir us ke ba'd apne ghar ko aansuon se dekhna

KHarid laun sab se mahngi chuDiyan jahan ki

phir ek KHwab rang-birangi chuDiyon se dekhna

kisi ki aarti suhag ke liye utarna

phir apni hi chita ko surmai dhuan se dekhna

baDa ajab gunah hai baDi ajib baat hai

ye ek dusre ko bhigi chahaton se dekhna

hum ek puri dastan hain yaad kar ke dekhiye

kabhi hamein wafa ke TuTe silsilon se dekhna

kahan-kahan jale charagh le ke hum khaDe rahe

hamari zinda dastan ko khanDaron se dekhna

bahut qarib hum ko apni aahaTon se paoge

nazar se dur ja ke hum ko raston se dekhna

zamin se aasman talak na koi baat paoge

kabhi kabhi ghazal ko us ke qafiyon se dekhna