baDi dil-shikan hai rah-e-safar koi ham-safar hai na yar hai

baḌī dil-shikan hai rah-e-safar koī ham-safar hai na yaar hai

ki javāñ-asar hai tamām shai na sukūn hai na qarār hai

zarā tez-gām baḌhe chalo hai fazā-e-sahrā musāfiro

jahāñ aañkh dil kī jhapak ga.ī vahīñ zindagī kā mazār hai

na rumūz-e-ishq se bā-ḳhabar na mizāj-e-husn se āgahī

ye mazāq-e-rāmish-o-rañg bhī rah-e-rāstī se farār hai

na kisī meñ husn-e-hayā rahā na kisī meñ bū-e-vafā rahī

abhī dosh-e-aql pe sar-basar koī dev-e-makr savār hai

hai zamīr-e-zinda ke vāste to bisāt-e-gul bhī tabāh-kun

mire ham-jalīs ḳhabar bhī hai yahī āstīn kā maar hai

tirī be-panāh navāzisheñ tirī be-hisāb ināyateñ

mirī rūsiyāhī-e-gūnāgūñ kā hisāb hai na shumār hai

tirī rahmatoñ se hai duur kab mirī chāra-sāzī-e-be-kasī

kisī ġham-nasīb kī dahr meñ ye sadā se ḳhaas pukār hai

na kisī se adl kī baat kar na kisī se ḳhair kī rakh talab

ki matā-e-nūr-e-sahar yahāñ shab-e-tīra-e-tar pe nisār hai

tirī pand ḳhair-asar nahīñ tirī bandagī bhī ġhalat-nigar

tirā fikr nāseh-e-mohtaram abhī muflisī kā shikār hai

baDi dil-shikan hai rah-e-safar koi ham-safar hai na yar hai

ki jawan-asar hai tamam shai na sukun hai na qarar hai

zara tez-gam baDhe chalo hai faza-e-sahra musafiro

jahan aankh dil ki jhapak gai wahin zindagi ka mazar hai

na rumuz-e-ishq se ba-KHabar na mizaj-e-husn se aagahi

ye mazaq-e-ramish-o-rang bhi rah-e-rasti se farar hai

na kisi mein husn-e-haya raha na kisi mein bu-e-wafa rahi

abhi dosh-e-aql pe sar-basar koi dew-e-makr sawar hai

hai zamir-e-zinda ke waste to bisat-e-gul bhi tabah-kun

mere ham-jalis KHabar bhi hai yahi aastin ka mar hai

teri be-panah nawazishen teri be-hisab inayaten

meri rusiyahi-e-gunagun ka hisab hai na shumar hai

teri rahmaton se hai dur kab meri chaara-sazi-e-be-kasi

kisi gham-nasib ki dahr mein ye sada se KHas pukar hai

na kisi se adl ki baat kar na kisi se KHair ki rakh talab

ki mata-e-nur-e-sahar yahan shab-e-tira-e-tar pe nisar hai

teri pand KHair-asar nahin teri bandagi bhi ghalat-nigar

tera fikr naseh-e-mohtaram abhi muflisi ka shikar hai