baDi hairat se arbab-e-wafa ko dekhta hun main

baḌī hairat se arbāb-e-vafā ko dekhtā huuñ maiñ

ḳhatā ko dekhtā huuñ aur sazā ko dekhtā huuñ maiñ

abhī kuchh der hai shāyad mire māyūs hone meñ

abhī kuchh din fareb-e-rahnumā ko dekhtā huuñ maiñ

ḳhudā mālūm dil ko justujū hai kin jazīroñ kī

na jaane kin sitāroñ kī ziyā ko dekhtā huuñ maiñ

ye kyā ġham hai mire ash.ār ko nam kar diyā kis ne

ye dil meñ kis samundar kī ghaTā ko dekhtā huuñ maiñ

'zamīr' ik qaid-e-nā-mahsūs ko mahsūs kartā huuñ

kisī nādānī-e-zanjīr-e-pā ko dekhtā huuñ maiñ

baDi hairat se arbab-e-wafa ko dekhta hun main

KHata ko dekhta hun aur saza ko dekhta hun main

abhi kuchh der hai shayad mere mayus hone mein

abhi kuchh din fareb-e-rahnuma ko dekhta hun main

KHuda malum dil ko justuju hai kin jaziron ki

na jaane kin sitaron ki ziya ko dekhta hun main

ye kya gham hai mere ashaar ko nam kar diya kis ne

ye dil mein kis samundar ki ghaTa ko dekhta hun main

'zamir' ek qaid-e-na-mahsus ko mahsus karta hun

kisi nadani-e-zanjir-e-pa ko dekhta hun main