baDi haweli ke taqsim jab ujale hue

baḌī havelī ke taqsīm jab ujāle hue

jo be-charāġh the vo bhī charāġh vaale hue

na ā.inoñ ko ḳhabar thī na dast-e-vahshat ko

kahāñ gireñge ye patthar jo haiñ uchhāle hue

jo taḳht-o-tāj pe tanqīd karte phirte haiñ

ye saare log haiñ darbār se nikāle hue

phir aaj bhuuk hamārā shikār kar legī

ki raat ho ga.ī dariyā meñ jaal Daale hue

unheñ ḳhabar hī nahīñ sar nahīñ haiñ shānoñ par

jo apne hāthoñ meñ dastār haiñ sambhāle hue

vo log bhī to kināroñ pe aa ke Duub ga.e

jo kah rahe the samundar haiñ sab khañgāle hue

kisī ke aane pe ab tāliyoñ kā shor kahāñ

vo haar suukh chuke haiñ gale meñ Daale hue

baDi haweli ke taqsim jab ujale hue

jo be-charagh the wo bhi charagh wale hue

na aainon ko KHabar thi na dast-e-wahshat ko

kahan girenge ye patthar jo hain uchhaale hue

jo taKHt-o-taj pe tanqid karte phirte hain

ye sare log hain darbar se nikale hue

phir aaj bhuk hamara shikar kar legi

ki raat ho gai dariya mein jal Dale hue

unhen KHabar hi nahin sar nahin hain shanon par

jo apne hathon mein dastar hain sambhaale hue

wo log bhi to kinaron pe aa ke Dub gae

jo kah rahe the samundar hain sab khangale hue

kisi ke aane pe ab taliyon ka shor kahan

wo haar sukh chuke hain gale mein Dale hue