baDi latif baDi KHush-gawar guzri hai

baḌī latīf baḌī ḳhush-gavār guzrī hai

vo zindagī jo sar-e-kū-e-yār guzrī hai

halāk-e-gardish-e-lail-o-nahār guzrī hai

tamām umr baḌī be-qarār guzrī hai

maqām aisā bhī aayā hai ishq meñ ki jahāñ

nafas kī āmad-o-shud dil pe baar guzrī hai

nigāheñ farsh-e-rah-e-dost aur dil betāb

ajiib tarah shab-e-intizār guzrī hai

junūñ kā koī ta.alluq nahīñ chaman se magar

diloñ ke zaḳhm sajā kar bahār guzrī hai

nazākat-e-ġham-e-jānāñ kī intihā mat pūchh

shikāyat-e-ġham-e-daurāñ bhī baar guzrī hai

hamārī ziist kā hāsil na pūchh ai 'bismil'

asīr-e-gardish-e-lail-o-nahār guzrī hai

baDi latif baDi KHush-gawar guzri hai

wo zindagi jo sar-e-ku-e-yar guzri hai

halak-e-gardish-e-lail-o-nahaar guzri hai

tamam umr baDi be-qarar guzri hai

maqam aisa bhi aaya hai ishq mein ki jahan

nafas ki aamad-o-shud dil pe bar guzri hai

nigahen farsh-e-rah-e-dost aur dil betab

ajib tarah shab-e-intizar guzri hai

junun ka koi talluq nahin chaman se magar

dilon ke zaKHm saja kar bahaar guzri hai

nazakat-e-gham-e-jaanan ki intiha mat puchh

shikayat-e-gham-e-dauran bhi bar guzri hai

hamari zist ka hasil na puchh ai 'bismil'

asir-e-gardish-e-lail-o-nahaar guzri hai