baDi muddat se qismat aazmane ki tamanna hai

baḌī muddat se qismat āzmāne kī tamanna hai

tujhe paane tujhe apnā banāne kī tamanna hai

kabhī to bandagī kī lazzatoñ se āshnā hogā

kisī ke naqsh-e-pā par sar jhukāne kī tamanna hai

rulāyā hai mujhe jis ġham ne barsoñ ḳhuun ke aañsū

mujhe us ġham pe ik din muskurāne kī tamanna hai

ab un ke dar pe aa baiThī vo jāneñ yā mirī qismat

kahīñ aane kī ḳhvāhish hai na jaane kī tamanna hai

ilāhī ḳhair muddat ho ga.ī bhūle hue jis ko

vo naġhma sāz-e-dil par gungunāne kī tamanna hai

'vafā' tum bhī ajab ho ḳhuub hai baazī mohabbat kī

ki us ko jiit kar bhī haar jaane kī tamanna hai

baDi muddat se qismat aazmane ki tamanna hai

tujhe pane tujhe apna banane ki tamanna hai

kabhi to bandagi ki lazzaton se aashna hoga

kisi ke naqsh-e-pa par sar jhukane ki tamanna hai

rulaya hai mujhe jis gham ne barson KHun ke aansu

mujhe us gham pe ek din muskurane ki tamanna hai

ab un ke dar pe aa baiThi wo jaanen ya meri qismat

kahin aane ki KHwahish hai na jaane ki tamanna hai

ilahi KHair muddat ho gai bhule hue jis ko

wo naghma saz-e-dil par gungunane ki tamanna hai

'wafa' tum bhi ajab ho KHub hai bazi mohabbat ki

ki us ko jit kar bhi haar jaane ki tamanna hai