baDi talab thi baDa intizar dekho to

baḌī talab thī baḌā intizār dekho to

bahār laa.ī hai kaisī bahār dekho to

ye kyā huā ki salāmat nahīñ koī dāman

chaman meñ phuul khile haiñ ki ḳhaar dekho to

lahū diloñ kā charāġhoñ meñ kal bhī jaltā thā

aur aaj bhī hai vahī kārobār dekho to

yahāñ har ik rasan-o-dār hī dikhātā hai

ajiib shahr ajiib shahryār dekho to

na koī shāna bachā hai na koī ā.īna

darāz-dastī-e-gesū-e-yār dekho to

kisī se pyaar nahīñ phir bhī pyaar hai sab se

vo mast-e-husn hai kyā hoshiyār dekho to

vo chup bhī baiThe hai to aisā ban ke baiThe hai

har ik adā ye kahe hai pukār dekho to

abhī to ḳhuun kā sindūr hī lagāyā hai

abhī kare hai vo kyā kyā siñgār dekho to

adā hamīñ ne sikhā.ī nazar hamīñ ne dī

hamīñ se aañkh churāo ho yaar dekho to

asiir kar ke hameñ kyā phire hai itrātā

gale meñ Daale vo phūloñ kā haar dekho to

baDi talab thi baDa intizar dekho to

bahaar lai hai kaisi bahaar dekho to

ye kya hua ki salamat nahin koi daman

chaman mein phul khile hain ki KHar dekho to

lahu dilon ka charaghon mein kal bhi jalta tha

aur aaj bhi hai wahi karobar dekho to

yahan har ek rasan-o-dar hi dikhata hai

ajib shahr ajib shahryar dekho to

na koi shana bacha hai na koi aaina

daraaz-dasti-e-gesu-e-yar dekho to

kisi se pyar nahin phir bhi pyar hai sab se

wo mast-e-husn hai kya hoshiyar dekho to

wo chup bhi baiThe hai to aisa ban ke baiThe hai

har ek ada ye kahe hai pukar dekho to

abhi to KHun ka sindur hi lagaya hai

abhi kare hai wo kya kya singar dekho to

ada hamin ne sikhai nazar hamin ne di

hamin se aankh churao ho yar dekho to

asir kar ke hamein kya phire hai itraata

gale mein Dale wo phulon ka haar dekho to