badle andaz tumhaare nahin achchhe lagte

badle andāz tumhāre nahīñ achchhe lagte

ġhair ko chhup ke ishāre nahīñ achchhe lagte

jo bhī kahnā hai khule dil se sar-e-ām kaho

āñkhoñ āñkhoñ meñ ishāre nahīñ achchhe lagte

kuchh amal karke dikhāo to koī baat bane

aa.e din khokhle na.are nahīñ achchhe lagte

ham ko tūfāñ se ulajhne meñ maza aatā hai

aur ḳhāmosh kināre nahīñ achchhe lagte

hāl-e-mazlūm pe afsos ke iz.hār ke baad

un ke zālim ko ishāre nahīñ achchhe lagte

jo añdheroñ meñ palā aur baḌhā ho 'at.har'

us ko ye chāñd sitāre nahīñ achchhe lagte

badle andaz tumhaare nahin achchhe lagte

ghair ko chhup ke ishaare nahin achchhe lagte

jo bhi kahna hai khule dil se sar-e-am kaho

aankhon aankhon mein ishaare nahin achchhe lagte

kuchh amal karke dikhao to koi baat bane

aae din khokhle nare nahin achchhe lagte

hum ko tufan se ulajhne mein maza aata hai

aur KHamosh kinare nahin achchhe lagte

haal-e-mazlum pe afsos ke izhaar ke baad

un ke zalim ko ishaare nahin achchhe lagte

jo andheron mein pala aur baDha ho 'athar'

us ko ye chand sitare nahin achchhe lagte