badle badle mere gham-KHwar nazar aate hain

badle badle mire ġham-ḳhvār nazar aate haiñ

marhale 'ishq ke dushvār nazar aate haiñ

kashtī-e-ġhairat-e-ehsās salāmat yārab

aaj tūfān ke āsār nazar aate haiñ

inqalāb aayā na jaane ye chaman meñ kaisā

ġhuncha-o-gul mujhe talvār nazar aate haiñ

jin kī āñkhoñ se chhalaktā thā kabhī rañg-e-ḳhulūs

in dinoñ mā.il-e-takrār nazar aate haiñ

jo sunā karte the hañs hañs ke kabhī nāma-e-shauq

ab mirī shakl se bezār nazar aate haiñ

un ke aage jo jhukī rahtī haiñ nazreñ apnī

is liye ham hī ḳhatā-vār nazar aate haiñ

dushman-e-ḳhū-e-vafā rasm-e-mohabbat ke harīf

vahī kyā aur bhī do-chār nazar aate haiñ

jins-e-nāyāb-e-mohabbat kī ḳhudā ḳhair kare

bul-havas us ke ḳharīdār nazar aate haiñ

vaqt ke pūjne vaale haiñ pujārī un ke

koī matlab ho to ġham-ḳhvār nazar aate haiñ

jā.eza dil kā agar lo to vafā se ḳhālī

shakl dekho to namak-ḳhvār nazar aate haiñ

roz-e-raushan meñ agar un ko dikhāo taare

vo ye kah deñge ki sarkār nazar aate haiñ

ham na badle the na badle haiñ na badleñge 'shakīl'

ek hī rang meñ har baar nazar aate haiñ

badle badle mere gham-KHwar nazar aate hain

marhale 'ishq ke dushwar nazar aate hain

kashti-e-ghairat-e-ehsas salamat yarab

aaj tufan ke aasar nazar aate hain

inqalab aaya na jaane ye chaman mein kaisa

ghuncha-o-gul mujhe talwar nazar aate hain

jin ki aankhon se chhalakta tha kabhi rang-e-KHulus

in dinon mail-e-takrar nazar aate hain

jo suna karte the hans hans ke kabhi nama-e-shauq

ab meri shakl se bezar nazar aate hain

un ke aage jo jhuki rahti hain nazren apni

is liye hum hi KHata-war nazar aate hain

dushman-e-KHu-e-wafa rasm-e-mohabbat ke harif

wahi kya aur bhi do-chaar nazar aate hain

jins-e-nayab-e-mohabbat ki KHuda KHair kare

bul-hawas us ke KHaridar nazar aate hain

waqt ke pujne wale hain pujari un ke

koi matlab ho to gham-KHwar nazar aate hain

jaeza dil ka agar lo to wafa se KHali

shakl dekho to namak-KHwar nazar aate hain

roz-e-raushan mein agar un ko dikhao tare

wo ye kah denge ki sarkar nazar aate hain

hum na badle the na badle hain na badlenge 'shakil'

ek hi rang mein har bar nazar aate hain