badle hue haalat se mayus na hona

badle hue hālāt se māyūs na honā

insān ke jazbāt se māyūs na honā

ye raat usī kī hai sahar bhī hai usī kī

is dard-bharī raat se māyūs na honā

har dil se udāsī kā bharam toḌte rahnā

māyūs ḳhayālāt se māyūs na honā

maanā ki bahut aag hai māhaul meñ lekin

is mulk kī barsāt se māyūs na honā

duniyā se bahut aas lagānā nahīñ ai dost

duniyā kī kisī baat se māyūs na honā

kuchh log zarā der meñ khulte haiñ kisī se

pahlī hī mulāqāt se māyūs na honā

āvāra savālāt kī manzil bhī hai 'vāqif'

duniyā ke javābāt se māyūs na honā

badle hue haalat se mayus na hona

insan ke jazbaat se mayus na hona

ye raat usi ki hai sahar bhi hai usi ki

is dard-bhari raat se mayus na hona

har dil se udasi ka bharam toDte rahna

mayus KHayalat se mayus na hona

mana ki bahut aag hai mahaul mein lekin

is mulk ki barsat se mayus na hona

duniya se bahut aas lagana nahin ai dost

duniya ki kisi baat se mayus na hona

kuchh log zara der mein khulte hain kisi se

pahli hi mulaqat se mayus na hona

aawara sawalat ki manzil bhi hai 'waqif'

duniya ke jawabaat se mayus na hona