badle mein duaon ke kabhi zar nahin lete

badle meñ duāoñ ke kabhī zar nahīñ lete

ehsān kisī kā bhī qalandar nahīñ lete

ḳhud manzil-e-maqsūd lipaT jaatī hai un se

rahbar kā sahārā vo kahīñ par nahīñ lete

so jaate haiñ bore pe chatā.ī pe kahīñ bhī

muflis to kabhī maḳhmalī bistar nahīñ lete

ho jaa.e jahāñ raat vahīñ din ko baserā

bechāre ye banjāre kahīñ ghar nahīñ lete

sab luuT liyā karte haiñ balvā.ī fasādī

ujḌe hue logoñ kā muqaddar nahīñ lete

ashkoñ se hī ham pyaas bujhā lete haiñ 'nāzāñ'

ḳhuddār haiñ kuchh aise samundar nahīñ lete

badle mein duaon ke kabhi zar nahin lete

ehsan kisi ka bhi qalandar nahin lete

KHud manzil-e-maqsud lipaT jati hai un se

rahbar ka sahaara wo kahin par nahin lete

so jate hain bore pe chatai pe kahin bhi

muflis to kabhi maKHmali bistar nahin lete

ho jae jahan raat wahin din ko basera

bechaare ye banjare kahin ghar nahin lete

sab luT liya karte hain balwai fasadi

ujDe hue logon ka muqaddar nahin lete

ashkon se hi hum pyas bujha lete hain 'nazan'

KHuddar hain kuchh aise samundar nahin lete