بدلے تعلقات فسانہ بدل گیا

بدلے تعلقات فسانہ بدل گیا

تم کیا چلے گئے کہ زمانہ بدل گیا

حالات کے شعور سے برہم ہے آدمی

سرگم میں دم نہیں ہے ترانہ بدل گیا

احساس اور عقل کی مجبوریاں نہ پوچھ

صورت بدل گئی تو بہانہ بدل گیا

وہ مشغلہ ہوں میں جسے جینا کہا کریں

میں ہوں وہ سلسلہ جو ٹھکانا بدل گیا

میں ایک راہ رو جسے منزل نہیں قبول

میں ایک ولولہ جو زمانہ بدل گیا

معنی بدک کے رہ گئے صدیوں کی بھیڑ میں

لفظوں کی آندھیوں کا زمانہ بدل گیا

ایسی ہوا چلی ہے کہ بھڑکے ہے آرزو

ایسی گھٹا اٹھی کہ فسانہ بدل گیا