badle talluqat fasana badal gaya

badle ta.alluqāt fasāna badal gayā

tum kyā chale ga.e ki zamāna badal gayā

hālāt ke shu.ūr se barham hai aadmī

sargam meñ dam nahīñ hai tarāna badal gayā

ehsās aur aql kī majbūriyāñ na pūchh

sūrat badal ga.ī to bahāna badal gayā

vo mashġhala huuñ maiñ jise jiinā kahā kareñ

maiñ huuñ vo silsila jo Thikānā badal gayā

maiñ ek rāh-rau jise manzil nahīñ qubūl

maiñ ek valvala jo zamāna badal gayā

ma.anī bidak ke rah ga.e sadiyoñ kī bhiiḌ meñ

lafzoñ kī āñdhiy.oñ kā zamāna badal gayā

aisī havā chalī hai ki bhaḌke hai aarzū

aisī ghaTā uThī ki fasāna badal gayā

badle talluqat fasana badal gaya

tum kya chale gae ki zamana badal gaya

haalat ke shuur se barham hai aadmi

sargam mein dam nahin hai tarana badal gaya

ehsas aur aql ki majburiyan na puchh

surat badal gai to bahana badal gaya

wo mashghala hun main jise jina kaha karen

main hun wo silsila jo Thikana badal gaya

main ek rah-rau jise manzil nahin qubul

main ek walwala jo zamana badal gaya

mani bidak ke rah gae sadiyon ki bhiD mein

lafzon ki aandhiyon ka zamana badal gaya

aisi hawa chali hai ki bhaDke hai aarzu

aisi ghaTa uThi ki fasana badal gaya