badlega ruKH hawa kabhi to

badlegā ruḳh havā kabhī to

khul jā.egā rāsta kabhī to

ġhaflat pe ḳhud apnī chauñk uTThegā

sun kar vo mirī sadā kabhī to

ho jā.egā munkashif bhī ḳhud par

dekhegā vo aa.ina kabhī to

kab tak ye adā-e-be-niyāzī

TūTegā ye silsila kabhī to

kholegā vo mujh pe bāb-e-rahmat

sun legā mirī du'ā kabhī to

qaa.em hai umiid par hī duniyā

hal hogā ye mas.ala kabhī to

kar degā zamīñ kā bojh halkā

uTThegā girā huā kabhī to

baiThā huuñ maiñ us ke rāste par

ho jā.egā sāmnā kabhī to

dī hai dard-e-dil pe us ke dastak

tai hogā ye fāsla kabhī to

badlega ruKH hawa kabhi to

khul jaega rasta kabhi to

ghaflat pe KHud apni chaunk uTThega

sun kar wo meri sada kabhi to

ho jaega munkashif bhi KHud par

dekhega wo aaina kabhi to

kab tak ye ada-e-be-niyazi

TuTega ye silsila kabhi to

kholega wo mujh pe bab-e-rahmat

sun lega meri du'a kabhi to

qaem hai umid par hi duniya

hal hoga ye masala kabhi to

kar dega zamin ka bojh halka

uTThega gira hua kabhi to

baiTha hun main us ke raste par

ho jaega samna kabhi to

di hai dard-e-dil pe us ke dastak

tai hoga ye fasla kabhi to