badli hui dildar nazar dekh rahe hain

badlī huī dildār nazar dekh rahe haiñ

dekhī nahīñ jaatī hai magar dekh rahe haiñ

kuchh logoñ kī nazroñ meñ mirī ābla-pā.ī

kuchh log mirā azm-e-safar dekh rahe haiñ

hai sāmne un ke mere hoñToñ pe tabassum

lekin vo mirā dīda-e-tar dekh rahe haiñ

yuuñ dekhte rahne meñ basārat hī gañvā dī

par ab bhī tirī rāhguzar dekh rahe haiñ

ik maiñ ki faqat un kī taraf dekh rahā huuñ

ik vo haiñ ki rab jaane kidhar dekh rahe haiñ

pahle to mire haath qalam kar diye aur ab

hairat se mirā kār-e-hunar dekh rahe haiñ

'nāsir' tire shānoñ pe tire chāhne vaale

ye bhī to ġhanīmat hai ki sar dekh rahe haiñ

badli hui dildar nazar dekh rahe hain

dekhi nahin jati hai magar dekh rahe hain

kuchh logon ki nazron mein meri aabla-pai

kuchh log mera azm-e-safar dekh rahe hain

hai samne un ke mere honTon pe tabassum

lekin wo mera dida-e-tar dekh rahe hain

yun dekhte rahne mein basarat hi ganwa di

par ab bhi teri rahguzar dekh rahe hain

ek main ki faqat un ki taraf dekh raha hun

ek wo hain ki rab jaane kidhar dekh rahe hain

pahle to mere hath qalam kar diye aur ab

hairat se mera kar-e-hunar dekh rahe hain

'nasir' tere shanon pe tere chahne wale

ye bhi to ghanimat hai ki sar dekh rahe hain