badli hui nazron se ab bhi andaz purane mange hai

badlī huī nazroñ se ab bhī andāz purāne māñge hai

dil merā kitnā mūrakh hai vo biite zamāne māñge hai

muddat huī dil tārāj hue muddat huī rishtoñ ko TuuTe

duniyā hai ki zālim aaj bhī vo rangīn fasāne māñge hai

dil hai ki vo hai murjhāyā sā har aas kā chehra hai utrā

har dost mirā phir bhī mujh se ḳhushiyoñ ke ḳhazāne māñge hai

hālāt ne aañsū baḳhshe haiñ taqdīr meñ ronā likkhā hai

aur vaqt na jaane kyoñ mujh se hoñToñ pe tarāne māñge hai

'aql aur ḳhirad donoñ mujh ko detī haiñ du'ā.eñ jiine kī

ehsās mirā mujh se lekin marne ke bahāne māñge hai

bastī kaisī mahfil kaisī kaise kūche kaise bāzār

duniyā se jahāñ chhup kar ro le dil aise Thikāne māñge hai

har chaah kā badla chāhat ho har pyaar kā pyārā ho anjām

kuchh soch zarā tū duniyā se kyā chiiz divāne māñge hai

badli hui nazron se ab bhi andaz purane mange hai

dil mera kitna murakh hai wo bite zamane mange hai

muddat hui dil taraj hue muddat hui rishton ko TuTe

duniya hai ki zalim aaj bhi wo rangin fasane mange hai

dil hai ki wo hai murjhaya sa har aas ka chehra hai utra

har dost mera phir bhi mujh se KHushiyon ke KHazane mange hai

haalat ne aansu baKHshe hain taqdir mein rona likkha hai

aur waqt na jaane kyon mujh se honTon pe tarane mange hai

'aql aur KHirad donon mujh ko deti hain du'aen jine ki

ehsas mera mujh se lekin marne ke bahane mange hai

basti kaisi mahfil kaisi kaise kuche kaise bazar

duniya se jahan chhup kar ro le dil aise Thikane mange hai

har chah ka badla chahat ho har pyar ka pyara ho anjam

kuchh soch zara tu duniya se kya chiz diwane mange hai