بدنام کا جہاں میں سہارا نہیں کوئی

بدنام کا جہاں میں سہارا نہیں کوئی

پتھر ہر ایک ہاتھ میں عیسیٰ نہیں کوئی

کچھ دیر میری کھاٹ پہ بیٹھو مرے عزیز

اس کھاٹ میں چھپا ہوا کانٹا نہیں کوئی

کمزوریوں کا میری جہاں بھر میں شور ہے

میری خصوصیات کا چرچا نہیں کوئی

خیرات چار ٹکڑوں کی نکلے تھے بانٹنے

ایسا لگا زمین پہ بھوکا نہیں کوئی

ہم بھی معاشرے کو چلے تھے سنوارنے

دشمن ہزار ہو گئے سدھرا نہیں کوئی

گملوں میں قید ہو گیا جاویدؔ پھول کیوں

گھر کی حدوں کے پار تو مہکا نہیں کوئی