بدنامیٔ الفت کو یہ عار نہ سمجھے گا

بدنامیٔ الفت کو یہ عار نہ سمجھے گا

اس دل کو نہ سمجھاؤ زنہار نہ سمجھے گا

بیمار ہوا ہوں میں اک عشوۂ پنہاں سے

عیسیٰ بھی مرے دل کو آزار نہ سمجھے گا

حرص اس لب شیریں کی کیا دل سے مرے کم ہو

پرہیز کبھو اچھا بیمار نہ سمجھے گا

غفلت کو جوانی کی کچھ پوچھو نہ اے زاہد

بے ہوشی کی لذت کو ہشیار نہ سمجھے گا

گو راہ محبت میں جاتی ہیں چلی جانیں

مرد رہ عشق اس کو دشوار نہ سمجھے گا

مجھ سے ہے اسے ملنا اک ننگ کا باعث ہے

اغیار کے ملنے کو وہ عار نہ سمجھے گا

سمجھانے دو ناصح کو مت منع کرو یارو

جب تک نہ سنے گا وہ دو چار نہ سمجھے گا

حال دل خوں گشتہ نامیؔ نے لہو رو رو

نامہ میں کیا انشا پر یار نہ سمجھے گا