baghair tole paron ko uDan mat lena

baġhair tole paroñ ko uḌaan mat lenā

zamīn vaalo kabhī āsmān mat lenā

ye bām-o-dar bhī agar jism ke pighal jaa.eñ

kisī se bhiik meñ tum sā.ebān mat lenā

bahut aziim hunar hai ye ḳhāksārī bhī

tum apne sar pe magar ḳhāk-dān mat lenā

bas ab to poñchh lo gard-e-malāl chehre se

kisī ke zabt kā phir imtihān mat lenā

jahāñ pe log bahut bā-shu.ūr hote haiñ

ḳhulūs-e-dil kā vahāñ imtihān mat lenā

nibāh aap agar chāhte haiñ duniyā se

kahīñ bhī shart koī darmiyān mat lenā

jo kah sako to kaho varna chup raho 'asrār'

kahīñ se qarz meñ lafz-e-bayān mat lenā

baghair tole paron ko uDan mat lena

zamin walo kabhi aasman mat lena

ye baam-o-dar bhi agar jism ke pighal jaen

kisi se bhik mein tum saeban mat lena

bahut azim hunar hai ye KHaksari bhi

tum apne sar pe magar KHak-dan mat lena

bas ab to ponchh lo gard-e-malal chehre se

kisi ke zabt ka phir imtihan mat lena

jahan pe log bahut ba-shuur hote hain

KHulus-e-dil ka wahan imtihan mat lena

nibah aap agar chahte hain duniya se

kahin bhi shart koi darmiyan mat lena

jo kah sako to kaho warna chup raho 'asrar'

kahin se qarz mein lafz-e-bayan mat lena