baghair uske ye hairan hain baghal dekh apni Khaali hum

baġhair us ke ye hairāñ haiñ baġhal dekh apnī ḳhālī ham

ki karvaT le nahīñ sakte haiñ juuñ tasvīr-e-qālī ham

koī ātish kā parkāla jo vaqt-e-ḳhvāb yaad aave

to samjheñ kyuuñ na añgāre ye gul-hā-e-nihālī ham

irāda gar kiyā dushnām dene kā ab ai pyāre

to lab se lab milā kar bas tirī khā leñge gaalī ham

na ho pahlū meñ apne jab vo sabza rañg hī zālim

to phir kis rañg kāTeñ ye balā se raat kaalī ham

laḌī hai aañkh us se jo ye chitvan meñ jatātā hai

kisī kī kyā hameñ parvā haiñ apne lā-ubālī ham

na ho vo sīm-tan paas apne jab sair-e-shab-e-mah meñ

kareñ to dekh kyā bas ek pītal kī sī thālī ham

jo ho dūr-az-ḳhayāl-e-'mānī'-o-'bahzād' har sūrat

baġhair-az-mū-qalam khīñchīñ vo tasvīr-e-ḳhyālī ham

kareñ vasf-e-jamāl-e-yār meñ ik sher gar mauzūñ

to samjheñ intiḳhāb-e-jumla ash.ā-e-jamālī ham

ba-kunj-e-be-kasī paḌhte haiñ jo ham marsiya dil kā

to haiñ aap hī javābī aur aap hī haiñ savālī ham

vo Duubā itr meñ ho mast-e-mai masrūf-e-sair-e-gul

aur us ko is ravish dekheñ darūn-e-bāġh-e-ḳhālī ham

gul-e-ummīd to shāyad ki apnā bhī shagufta ho

ta.ajjub kuchh nahīñ gar paa.eñ phal paate sahālī ham

zi-bas hālāt-e-ishq ab ham pe taarī hai sadā 'jur.at'

ba-tarz-e-āshiqāna kahte haiñ ash.ār-e-'hālī' ham

baghair us ke ye hairan hain baghal dekh apni KHali hum

ki karwaT le nahin sakte hain jun taswir-e-qali hum

koi aatish ka parkala jo waqt-e-KHwab yaad aawe

to samjhen kyun na angare ye gul-ha-e-nihaali hum

irada gar kiya dushnam dene ka ab ai pyare

to lab se lab mila kar bas teri kha lenge gali hum

na ho pahlu mein apne jab wo sabza rang hi zalim

to phir kis rang kaTen ye bala se raat kali hum

laDi hai aankh us se jo ye chitwan mein jatata hai

kisi ki kya hamein parwa hain apne la-ubaali hum

na ho wo sim-tan pas apne jab sair-e-shab-e-mah mein

karen to dekh kya bas ek pital ki si thaali hum

jo ho dur-az-KHayal-e-'mani'-o-'bahzad' har surat

baghair-az-mu-qalam khinchin wo taswir-e-KHyali hum

karen wasf-e-jamal-e-yar mein ek sher gar mauzun

to samjhen intiKHab-e-jumla asha-e-jamali hum

ba-kunj-e-be-kasi paDhte hain jo hum marsiya dil ka

to hain aap hi jawabi aur aap hi hain sawali hum

wo Duba itr mein ho mast-e-mai masruf-e-sair-e-gul

aur us ko is rawish dekhen darun-e-bagh-e-KHali hum

gul-e-ummid to shayad ki apna bhi shagufta ho

tajjub kuchh nahin gar paen phal pate sahaali hum

zi-bas haalat-e-ishq ab hum pe tari hai sada 'jurat'

ba-tarz-e-ashiqana kahte hain ashaar-e-'haali' hum