بغور دیکھو تو زخموں کا اک چمن سا ہے

بغور دیکھو تو زخموں کا اک چمن سا ہے

سکوت تشنہ تمناؤں کا کفن سا ہے

کبھی کھل اٹھتے ہیں یادوں کے بھی کنول ورنہ

بہار میں بھی یہ دل اک اداس بن سا ہے

ابھر رہا ہے جو نغمہ بہار کے دل سے

گداز و سوز کچھ اس میں ترے بدن سا ہے

چمن سے دور چمن کے ہر اک خیال سے دور

کھلا ہوا مری آنکھوں میں اک چمن سا ہے

نظر نظر میں گھلاوٹ ہے بد گمانی کی

ہجوم ماہ میں کھلتا ہوا گہن سا ہے

ہے کعبہ کتنے سمن پوش نازنینوں کا

یہ دل جو کہنے کو یوں چاک پیرہن سا ہے

مرا جنوں ہے ادب آشنا ابھی ورنہ

حرم کے پردے میں بھی ایک برہمن سا ہے