bagulon ki safen kirnon ke lashkar samne aae

bagūloñ kī safeñ kirnoñ ke lashkar sāmne aa.e

qadam uTThe jidhar zaḳhmoñ ke patthar sāmne aa.e

thakan se TuuT kar jab ḳhvāb-e-rāhat kī tamannā kī

ridā-e-ġham liye kāñToñ ke bistar sāmne aa.e

darīda bādbāñ kamzor kashtī raat tūfānī

dahan khole siyāhī ke samundar sāmne aa.e

talāsh-e-āb-e-haivāñ meñ jahāñ mere qadam pahuñche

vahāñ zahrāb se labrez sāġhar sāmne aa.e

ġharīb-e-shahr kis ke āstāne par sadā detā

ka.ī ghar raah meñ dekhe ka.ī dar sāmne aa.e

mire ḳhuddār lab par jab kabhī lafz-e-anā aayā

mirī qīmat lagāne kīsa-e-zar sāmne aa.e

mizāj aisā hai kuchh 'māhir' muravvat aa hī jaatī hai

koī shātir agar mā'sūm ban kar sāmne aa.e

bagulon ki safen kirnon ke lashkar samne aae

qadam uTThe jidhar zaKHmon ke patthar samne aae

thakan se TuT kar jab KHwab-e-rahat ki tamanna ki

rida-e-gham liye kanTon ke bistar samne aae

darida baadban kamzor kashti raat tufani

dahan khole siyahi ke samundar samne aae

talash-e-ab-e-haiwan mein jahan mere qadam pahunche

wahan zahrab se labrez saghar samne aae

gharib-e-shahr kis ke aastane par sada deta

kai ghar rah mein dekhe kai dar samne aae

mere KHuddar lab par jab kabhi lafz-e-ana aaya

meri qimat lagane kisa-e-zar samne aae

mizaj aisa hai kuchh 'mahir' murawwat aa hi jati hai

koi shatir agar ma'sum ban kar samne aae