baha ke baiThe hain ashkon ka ek samundar hum

bahā ke baiThe haiñ ashkoñ kā ik samundar ham

phir aa ga.e haiñ tire gaañv se guzar kar ham

kisī kī aarzū ham the jo na huī puurī

kisī ko ho ga.e bin kuchh kiye mayassar ham

tumhāre dil meñ hī rahte the ham to muddat se

kise batā.eñ ki ab ho ga.e haiñ be-ghar ham

isī liye to giraftār haiñ masā.il meñ

samajhne ḳhud ko lage dūsroñ se behtar ham

fuzūl aap bhī koshish na kījiye sāhab

na aa sakeñge kabhī qaid-e-ġham se bāhar ham

na kuchh vo mere binā hai na kuchh maiñ un ke binā

agar vo mere sanam haiñ to un ke aazar ham

ye aur baat ki arsa huā bichhaḌ ke magar

na ab talak bhī unheñ bhuul paa.e 'haidar' ham

baha ke baiThe hain ashkon ka ek samundar hum

phir aa gae hain tere ganw se guzar kar hum

kisi ki aarzu hum the jo na hui puri

kisi ko ho gae bin kuchh kiye mayassar hum

tumhaare dil mein hi rahte the hum to muddat se

kise bataen ki ab ho gae hain be-ghar hum

isi liye to giraftar hain masail mein

samajhne KHud ko lage dusron se behtar hum

fuzul aap bhi koshish na kijiye sahab

na aa sakenge kabhi qaid-e-gham se bahar hum

na kuchh wo mere bina hai na kuchh main un ke bina

agar wo mere sanam hain to un ke aazar hum

ye aur baat ki arsa hua bichhaD ke magar

na ab talak bhi unhen bhul pae 'haidar' hum