bahaar aai gul-afshaniyon ke din aae

bahār aa.ī gul-afshāniyoñ ke din aa.e

uThāo saaz ġhazal-ḳhvāniyoñ ke din aa.e

nigāh-e-shauq kī gustāḳhiyoñ kā daur aayā

dil-e-ḳharāb kī nādāniyoñ ke din aa.e

nigāh-e-husn ḳharīdāriyoñ pe maa.il hai

matā-e-shauq kī arzāniyoñ ke din aa.e

mizāj-e-aql kī nā-sāziyoñ kā mausam hai

junūñ kī silsila-jambāniyoñ ke din aa.e

saroñ ne dāvat-e-āshuftagī kā qasd kiyā

diloñ meñ dard kī mehmāniyoñ ke din aa.e

charāġh-e-lāla-o-gul kī Tapak paḌī haiñ laveñ

chaman meñ phir sharer-afshāniyoñ ke din aa.e

bahār bā.is-e-jam.īyat-e-chaman na huī

shamīm-e-gul kī pareshāniyoñ ke din aa.e

udhar chaman meñ zar-e-gul luTā idhar 'tābāñ'

hamārī be-sar-o-sāmāniyoñ ke din aa.e

bahaar aai gul-afshaniyon ke din aae

uThao saz ghazal-KHwaniyon ke din aae

nigah-e-shauq ki gustaKHiyon ka daur aaya

dil-e-KHarab ki nadaniyon ke din aae

nigah-e-husn KHaridariyon pe mail hai

mata-e-shauq ki arzaniyon ke din aae

mizaj-e-aql ki na-saziyon ka mausam hai

junun ki silsila-jambaniyon ke din aae

saron ne dawat-e-ashuftagi ka qasd kiya

dilon mein dard ki mehmaniyon ke din aae

charagh-e-lala-o-gul ki Tapak paDi hain lawen

chaman mein phir sharer-afshaniyon ke din aae

bahaar bais-e-jamiyat-e-chaman na hui

shamim-e-gul ki pareshaniyon ke din aae

udhar chaman mein zar-e-gul luTa idhar 'taban'

hamari be-sar-o-samaniyon ke din aae