bahaar aai hai mastana ghaTa kuchh aur kahti hai

bahār aa.ī hai mastāna ghaTā kuchh aur kahtī hai

magar un shoḳh nazroñ kī hayā kuchh aur kahtī hai

rihā.ī kī ḳhabar kis ne uḌaa.ī sehn-e-gulshan meñ

asīrān-e-qafas se to sabā kuchh aur kahtī hai

bahut ḳhush hai dil-e-nādāñ havā-e-kū-e-jānāñ meñ

magar ham se zamāne kī havā kuchh aur kahtī hai

tū mere dil kī sun āġhosh ban kar kah rahā hai kuchh

tirī nīchī nazar to jaane kyā kuchh aur kahtī hai

mirī jānib se kah denā sabā lahore vāloñ se

ki is mausam meñ dehlī kī havā kuchh aur kahtī hai

huī muddat ke mai-noshī se tauba kar chuke 'aḳhtar'

magar dehlī kī mastāna fazā kuchh aur kahtī hai

bahaar aai hai mastana ghaTa kuchh aur kahti hai

magar un shoKH nazron ki haya kuchh aur kahti hai

rihai ki KHabar kis ne uDai sehn-e-gulshan mein

asiran-e-qafas se to saba kuchh aur kahti hai

bahut KHush hai dil-e-nadan hawa-e-ku-e-jaanan mein

magar hum se zamane ki hawa kuchh aur kahti hai

tu mere dil ki sun aaghosh ban kar kah raha hai kuchh

teri nichi nazar to jaane kya kuchh aur kahti hai

meri jaanib se kah dena saba lahore walon se

ki is mausam mein dehli ki hawa kuchh aur kahti hai

hui muddat ke mai-noshi se tauba kar chuke 'aKHtar'

magar dehli ki mastana faza kuchh aur kahti hai