bahaar aai hai phir pairahan gulabi ho

bahār aa.ī hai phir pairahan gulābī ho

vo chāñd aa.e sar-e-anjuman gulābī ho

siyāh raat sī chhā.ī vo zulf chehre par

jabīn-e-nāz gulābī badan gulābī ho

khuleñ jo band-e-qabā raat jagmagā uTThe

mahaktī sej shikan-dar-shikan gulābī ho

havā kī larzisheñ dahkātīñ āriz-o-lab ko

hayā kī mauj se saarā badan gulābī ho

vo hoñT chup hoñ to āñkhoñ meñ phuul se jhamkeñ

hileñ to saarī fazā-e-suḳhan gulābī ho

gulāl is tarah barsā.e koī chaar taraf

chaman gulābī havā-e-chaman gulābī ho

siyāhī-e-shab-e-hijrāñ siyāh-tar na karo

jo ho to chāñd kā mere gahan gulābī ho

vatan se duur bahāroñ ko khojne vaale

jo in dinoñ meñ zamīn-e-vatan gulābī ho

bahaar aai hai phir pairahan gulabi ho

wo chand aae sar-e-anjuman gulabi ho

siyah raat si chhai wo zulf chehre par

jabin-e-naz gulabi badan gulabi ho

khulen jo band-e-qaba raat jagmaga uTThe

mahakti sej shikan-dar-shikan gulabi ho

hawa ki larzishen dahkatin aariz-o-lab ko

haya ki mauj se sara badan gulabi ho

wo honT chup hon to aankhon mein phul se jhamken

hilen to sari faza-e-suKHan gulabi ho

gulal is tarah barsae koi chaar taraf

chaman gulabi hawa-e-chaman gulabi ho

siyahi-e-shab-e-hijran siyah-tar na karo

jo ho to chand ka mere gahan gulabi ho

watan se dur bahaaron ko khojne wale

jo in dinon mein zamin-e-watan gulabi ho