bahaar aai hai rang-e-qayas taza liye

bahār aa.ī hai rang-e-qayās taaza liye

shajar shajar ke badan par libās taaza liye

hamārī samt kisī ne palaT ke dekhā nahīñ

tamām phirte rahe lab pe pyaas taaza liye

koī milā na ḳharīdār ham ko shaam talak

bhaTak rahe haiñ lahū kā gilās taaza liye

guloñ kī ḳhair nahīñ ab kisī tarah shāyad

ḳhizāñ kā qāfila niklā hai aas taaza liye

na jaane kaun sī duniyā meñ khoyā rahtā hai

abhī to aayā hai hosh-o-havās taaza liye

ye to kisī ko pata hī nahīñ chalā 'ātish'

kahāñ se aa.ī havā sabz ghaas taaza liye

bahaar aai hai rang-e-qayas taza liye

shajar shajar ke badan par libas taza liye

hamari samt kisi ne palaT ke dekha nahin

tamam phirte rahe lab pe pyas taza liye

koi mila na KHaridar hum ko sham talak

bhaTak rahe hain lahu ka gilas taza liye

gulon ki KHair nahin ab kisi tarah shayad

KHizan ka qafila nikla hai aas taza liye

na jaane kaun si duniya mein khoya rahta hai

abhi to aaya hai hosh-o-hawas taza liye

ye to kisi ko pata hi nahin chala 'atish'

kahan se aai hawa sabz ghas taza liye