bahaar aai kar ai baghban gulab qalam

bahār aa.ī kar ai bāġhbāñ gulāb qalam

ki likkhe vasf-e-ruḳh-e-yār kī kitāb qalam

na khīñche chehra-e-pur-nūr par naqāb qalam

kare na kāġhaz-e-tasvīr ko ḳharāb qalam

jo qasd ho ruḳh-e-raushan ke vasf likhne kā

falak se le varaq-e-māh-o-āftāb qalam

hikāyat-e-dil-e-be-tāb tuul rakhtī hai

na kar tū likhne meñ itnā bhī iztirāb qalam

bayān-e-zulf-e-chalīpā meñ qit.a likh likh kar

dikhā.e ḳhatt-e-shikasta kā pech-o-tāb qalam

hubāb se bhī bahut kam hai ziist kā vaqfa

hadīs-e-kashtī-e-mai meñ chale shitāb qalam

likhe na ātish-e-mai kī hikāyateñ aage

jigar na bāda-kashoñ ke kare kabāb qalam

shabīh khīñgā ik gul ke qadd-e-mauzūñ kī

likhegā misra-e-shamshād kā javāb qalam

hikāyat-e-shab-e-hijrāñ likho na ai 'ājiz'

hamārī jān-e-hazīñ kā na ho azaab qalam

bahaar aai kar ai baghban gulab qalam

ki likkhe wasf-e-ruKH-e-yar ki kitab qalam

na khinche chehra-e-pur-nur par naqab qalam

kare na kaghaz-e-taswir ko KHarab qalam

jo qasd ho ruKH-e-raushan ke wasf likhne ka

falak se le waraq-e-mah-o-aftab qalam

hikayat-e-dil-e-be-tab tul rakhti hai

na kar tu likhne mein itna bhi iztirab qalam

bayan-e-zulf-e-chalipa mein qita likh likh kar

dikhae KHatt-e-shikasta ka pech-o-tab qalam

hubab se bhi bahut kam hai zist ka waqfa

hadis-e-kashti-e-mai mein chale shitab qalam

likhe na aatish-e-mai ki hikayaten aage

jigar na baada-kashon ke kare kabab qalam

shabih khinga ek gul ke qadd-e-mauzun ki

likhega misra-e-shamshad ka jawab qalam

hikayat-e-shab-e-hijran likho na ai 'ajiz'

hamari jaan-e-hazin ka na ho azab qalam