bahaar aai to maiKHane se nikle

bahār aa.ī to maiḳhāne se nikle

bahak nikle ki bahkāne se nikle

haram tak raushnī hī raushnī thī

ham is aalam meñ but-ḳhāne se nikle

pighal kar bah ga.ī zanjīr-e-kaunain

vo sho.ale aaj paimāne se nikle

nigāh-e-mast ne dāman na chhoḌā

nikalne ko to maiḳhāne se nikle

ajab kyā hai ki is zulmat meñ ai dost

surāġh-e-sham.a parvāne se nikle

'ravish' apnā dil-e-nādāñ salāmat

hazāroñ kaam dīvāne se nikle

bahaar aai to maiKHane se nikle

bahak nikle ki bahkane se nikle

haram tak raushni hi raushni thi

hum is aalam mein but-KHane se nikle

pighal kar bah gai zanjir-e-kaunain

wo shoale aaj paimane se nikle

nigah-e-mast ne daman na chhoDa

nikalne ko to maiKHane se nikle

ajab kya hai ki is zulmat mein ai dost

suragh-e-shama parwane se nikle

'rawish' apna dil-e-nadan salamat

hazaron kaam diwane se nikle