bahaar ban ke jab se wo mere jahan pe chhae hain

bahār ban ke jab se vo mire jahāñ pe chhā.e haiñ

tajalliyoñ kī chāñdnī hai maktaboñ ke saa.e haiñ

Thahar Thahar ke ḳhush-gavār inqalāb aa.e haiñ

sambhal sambhal ke vo mire junūñ pe muskurā.e haiñ

hazār ehtiyāt kī hai laakh ġham chhupā.e haiñ

magar taḌap uThā hai dil vo jab bhī yaad aa.e haiñ

samajh samajh ke bārhā ye ban pare kī baat hai

fareb in kī mehrbāniyoñ ke ham ne khaa.e haiñ

sahar sahar mahak uThī chaman chaman sañvar gayā

bahār muskurā.ī hai ki aap muskurā.e haiñ

jo dil sajā chuke the ḳhud-parastiyoñ kī anjuman

ham un meñ jazba-e-ġham-e-jahāñ ubhār aa.e haiñ

naqāb ruḳh se jab uThī bikhar ga.iiñ tajalliyāñ

latīf bijliyāñ girī haiñ jab vo muskurā.e haiñ

dayār-e-teġh-o-dār ke jamāl ko nikhār ke

ham apne ḳhuuñ se maqtal-e-vafā sañvār aa.e haiñ

kabhī libās-e-nazm meñ kabhī ġhazal ke ruup meñ

jo vaqt kī pukār the vo giit ham ne gaa.e haiñ

'nihāl' kā.enāt meñ hameñ to ye yaqīn hai

ab aadmī nahīñ rahā hai aadmī ke saa.e haiñ

bahaar ban ke jab se wo mere jahan pe chhae hain

tajalliyon ki chandni hai maktabon ke sae hain

Thahar Thahar ke KHush-gawar inqalab aae hain

sambhal sambhal ke wo mere junun pe muskurae hain

hazar ehtiyat ki hai lakh gham chhupae hain

magar taDap uTha hai dil wo jab bhi yaad aae hain

samajh samajh ke barha ye ban pare ki baat hai

fareb in ki mehrbaniyon ke hum ne khae hain

sahar sahar mahak uThi chaman chaman sanwar gaya

bahaar muskurai hai ki aap muskurae hain

jo dil saja chuke the KHud-parastiyon ki anjuman

hum un mein jazba-e-gham-e-jahan ubhaar aae hain

naqab ruKH se jab uThi bikhar gain tajalliyan

latif bijliyan giri hain jab wo muskurae hain

dayar-e-tegh-o-dar ke jamal ko nikhaar ke

hum apne KHun se maqtal-e-wafa sanwar aae hain

kabhi libas-e-nazm mein kabhi ghazal ke rup mein

jo waqt ki pukar the wo git hum ne gae hain

'nihaal' kaenat mein hamein to ye yaqin hai

ab aadmi nahin raha hai aadmi ke sae hain