بہار لالہ و گل میں شگفتگی نہ رہی

بہار لالہ و گل میں شگفتگی نہ رہی

وہ کیا گئے کہ گلستاں میں دل کشی نہ رہی

جو وقف زندہ دلی تھی وہ زندگی نہ رہی

پلک جھپکتے ہی دنیا میں دل کشی نہ رہی

ہزار شمعیں فروزاں جو ہیں تو کیا حاصل

چراغ زیست کی آنکھوں میں روشنی نہ رہی

اسیر شام الم کو ہے انتظار سحر

مگر حیات سحر تک رہی رہی نہ رہی

خزاں کے دور میں اتنی کہاں تھی ویرانی

بھری بہار میں اک شاخ بھی ہری نہ رہی

شب فراق کی ظلمت ارے معاذ اللہ

ستارہ ہائے فلک میں بھی روشنی نہ رہی

مرے ہی دل میں غم دو جہاں سمیٹ دیا

نوازشات خدا میں کوئی کمی نہ رہی

کلام بھی ترا فریاد نغمہ اب ہے شریفؔ

حدیث زندہ دلی تیری شاعری نہ رہی