bahaar-e-lala-o-gul mein shaguftagi na rahi

bahār-e-lāla-o-gul meñ shaguftagī na rahī

vo kyā ga.e ki gulistāñ meñ dilkashī na rahī

jo vaqf-e-zinda-dilī thī vo zindagī na rahī

palak jhapakte hī duniyā meñ dilkashī na rahī

hazār sham.eñ farozāñ jo haiñ to kyā hāsil

charāġh-e-zīst kī āñkhoñ meñ raushnī na rahī

asīr-e-shām-e-alam ko hai intizār-e-sahar

magar hayāt sahar tak rahī rahī na rahī

ḳhizāñ ke daur meñ itnī kahāñ thī vīrānī

bharī bahār meñ ik shāḳh bhī harī na rahī

shab-e-firāq kī zulmat are ma.āz-allāh

sitāra-hā-e-falak meñ bhī raushnī na rahī

mire hī dil meñ ġham-e-do-jahāñ sameT diyā

navāzishāt-e-ḳhudā meñ koī kamī na rahī

kalām bhī tirā fariyād-e-naġhma ab hai 'sharīf'

hadīs-e-zinda-dilī terī shā.erī na rahī

bahaar-e-lala-o-gul mein shaguftagi na rahi

wo kya gae ki gulistan mein dilkashi na rahi

jo waqf-e-zinda-dili thi wo zindagi na rahi

palak jhapakte hi duniya mein dilkashi na rahi

hazar shamen farozan jo hain to kya hasil

charagh-e-zist ki aankhon mein raushni na rahi

asir-e-sham-e-alam ko hai intizar-e-sahar

magar hayat sahar tak rahi rahi na rahi

KHizan ke daur mein itni kahan thi virani

bhari bahaar mein ek shaKH bhi hari na rahi

shab-e-firaq ki zulmat are maaz-allah

sitara-ha-e-falak mein bhi raushni na rahi

mere hi dil mein gham-e-do-jahan sameT diya

nawazishat-e-KHuda mein koi kami na rahi

kalam bhi tera fariyaad-e-naghma ab hai 'sharif'

hadis-e-zinda-dili teri shaeri na rahi