bahaar-e-subh ne gul ko rula ke chhoD diya

bahār-e-sub.h ne gul ko rulā ke chhoḌ diyā

sharāb-e-nāb ko shabnam banā ke chhoḌ diyā

koī batā.e ki is nāḳhudā ko kyā kahiye

safīna jis ne bhañvar meñ phañsā ke chhoḌ diyā

vo saḳht-jāñ huuñ ki jab kāmyāb ho na sakī

tirī jafā ne mujhe aazmā ke chhoḌ diyā

tirī nazar kī bahār-āfrīniyoñ ke nisār

ki zaḳhm-e-dil ko gul-e-tar banā ke chhoḌ diyā

sitam hai terī jafā-e-vafā-numā ki mujhe

jafā-o-jaur kā ḳhūgar banā ke chhoḌ diyā

vahī hai zamzama-pairā diloñ meñ ai 'nayyar'

jise nasīb ne shā.ir banā ke chhoḌ diyā

bahaar-e-subh ne gul ko rula ke chhoD diya

sharab-e-nab ko shabnam bana ke chhoD diya

koi batae ki is naKHuda ko kya kahiye

safina jis ne bhanwar mein phansa ke chhoD diya

wo saKHt-jaan hun ki jab kaamyab ho na saki

teri jafa ne mujhe aazma ke chhoD diya

teri nazar ki bahaar-afriniyon ke nisar

ki zaKHm-e-dil ko gul-e-tar bana ke chhoD diya

sitam hai teri jafa-e-wafa-numa ki mujhe

jafa-o-jaur ka KHugar bana ke chhoD diya

wahi hai zamzama-paira dilon mein ai 'nayyar'

jise nasib ne shair bana ke chhoD diya